Wie au e huufe ander händ mer eus am Friitig of de Wäg nach Altenstadt gmacht. Partybus lade ond ab, rechtig Chreislinge, go d Oschtschwiizer isammle.
Bi sonnigem Wätter, zwei Gränze, e Schachtle Shots, gnue Wägverpflägig ond met huufe Material, semmer beschtens gluunt, gäge Obe am Gugg am See itroffe. Nach dem all Gummistiefel montiert händ, eschs losgange met iischpele. Grandios was so met bezeli Probe z stand chonnd!
Ziit zom Zachtässe hämmer den au no gfonde ond händ em Wätter entpschpächend e Raceletteobig gmacht. 
Scho het d Uhr de erschti Uftritt vo dem Weekend azeigt ond e ganze Quetscher Huufe het d Lüüt zom schtuune brocht. Nachem versorge vode Inschtrumänt esch Party ersch rechtig losgange... Di einte send chli ghöcklet, di andere händ tanzet ond die andere händ sech sosch chli zämebonde. :-) grockt hämmer de Lade so oder so!
Nach paar Schtöndli schlof send zwee Car ladige voll Partypeople nach Illertissen brocht worde, wo de erschti Uftrett agseit gsii esch. 
Of de Bühni hets zwar meh Lüüt gha as voredra, aber das het de Motivation nüd gmacht. Es esch om so besser gsii ond anhand vom Zappel siim Gsecht hets mächtig tschädderet!
Zwöscheziit hämmer de met Fleischsemmel, Bier ond Twister schpele verbrocht, bis mer de Bus weder händ chönne Lade ond zrog as Gugg am See chauffiert worde send. Anschliessend eschs de ehner e Gsammtprob gsii as e Uftritt, aber s het länger si meh Lüüt geh wo de Wäg vord Bühni gfonde händ...
De rätschte vom Nomitag esch met chli sii, loschtige Schpeli mache, Clubtanz lehre, oder chli trenke im WoMo Park verbrocht worde. Aso wie s Wätter het jede chli tue, was er het welle oder chönne.
Langsam esch Ziit worde för s Highlight vom Obe. Nomol e huufe Gsichter zom entgleise brenge... D Resonanz vom Uftritt esch gewaltig gsii ond Spass hets definitiv gmacht!
Nach dem de Zappel de Obe frei geh het, esch weder e Note.Quetscher Party losgange. Einfach grandios :-) S het weder mol zeigt, dass s Wätter kei Ifluss of d Stemmig hed!!!
Danke... Danke... Danke... För das i ha döffe so öpis met eu Erläbe. Ich bin geplättet, dankbar e Teil von de Note.Quetscher chönne zii ond freu mi of de Septämber!
Eue Probejöhler
d Hüsi
Und hier noch Luki's audiovisuelle Zusammenfassung :-)
