Aso es isch ebe so... mir sind ja so öppe zirka über 100 Lüüt i däm Verein... und es isch ja scho fasch e chli choge cheibe langwiilig, wenn immer dä bzw. die glich d Brichtli schriibt... drum hämmer das dasmal e chli andersch gmacht und es dörfed oder besser gseit müend sich mehreri zumne Ahlass üssere und das sogar i ihrem jewiilige Dialäkt.... ganz zum Amüsmoo vo de Läser :-)
Ich versuech mal no mini Heileits au churz i Wort z fasse... also so viel weissi ja gar nüm... d Chilbi! d Chilbi isch uf jeeede Fall sehr cool gsi und vorallem wo de Bisi versuecht het die doofe Ballön abezmärte... denn seit doch dä so voller überzügig, das mer zum andere Ballonverchöifer göched, wenn er eus die Ballön nöd günschtiger gäbi... und mir sind alli (öppe 10 Quetscher) voller überzügig am Bisi nahgloffe zum ebe zu däm andere Ballonverchöifer z gah... debii hets gar kein andere gäh (was de Bisi gwüsst het... aber mir Lemmings sind em eifach hindenah gloffed...) Uf jede Fall simmer iiiirgendwenn denn a eusi Ballön cho und händ demit e Ballonwand ufgstellt und s Passiere de Chilbibsuecher da demit e chli erschwärt... ganz viel Chind händ eus niidisch versuecht de eint oder ander Ballon z chlaue... aber mir händs nöd zueglah... ja und wo denn d Sandy (min Ahhang wo ich mitgschleikt ha) während em Uftritt z vorderscht gstande isch mit all dene Ballön und alli hindedrah nüt gseh händ wäge däm, da hets mich fasch verchlöpft uf de Bühni... fasch wie en Ballon. Ich merk grad, dass mir mundart schriibe überhaupt nöd liit und ich mich nid so rächt uf en Dialäkt cha einige mit mir und überhaupt. Ja es wiiters Heileit sind natürlich die schöne Prinzässinne Chröndli und Brüllene gsi... mir sind eifach wieder unschlagbar schön gsi...
Ja was söll me meh säge, es isch eifach wieder en sehr quetscherige Ahlass gsi, mit viel Verwandlige und es bizeli Alkohol. Mir häts gfalle... aber ich lah jetzt mal die andere zu Wort cho :-)
mia
Note.Quetscher in Appenzell, Appezöll, Appezell, Appizöll, Appäzöll, Appizäu
Das beschriibt ziemlech genau d Vielfältigkeit vo de Note.Quetscher. Am 28. Septämber hei mer üs mit Instrumänt, Grinde und Schlofsack befüllte Outos richtig Appizäu gmacht. Die einte hei dr Hunger mitgnoh und si sich im Städtli go d Büüch vollschloh. Üsi Paar hei es Resti (Truube, Tuube, vilech ou das näbedra) verwütscht mit „keine Essen“, aber s Bier, (ischs HeiNEKen gsi?) isch glich guet gsi au we mer NEK hei chönne ässe.
Am 5i hei mer die gmüetlechi mit Matratze und USA-Chüssi usgstatteti Ungerkunft in Beschlag gno. Chli vorgriffe, so ruhig isch es z Nacht gloub no nie gsi imene NQ-Masseschlag!! Dementsprächend hei mer de ou relativ lang gschlofe, bis fasch am 10ni, wes mer rächt isch.
Nach de 6i hei mer i dr Festhalle dr Gaschtgäber mit üsere Prob scho mau is Stuune brocht. Dasch immer wider e herrleche Ablick :-) Die erschte lüchtende Ouge. Nach em Ispile hei sich die wo nume es Bierli gha hei am Apero de sehr übers Bahmimamehnudledings gfröit. Und ig für mi ha min Begleiter vom Obe uf dr Getränkecharte gfunde – Himbeeriwy njamnjam
Es het de ä Momänt duuret, bis sich die Halle mit de chliine eh junge… (oder beides?) Gäscht gfüllt het, aber d Stimmig isch de schnäu ufcho und zum Glück ischs mit de Lüt ou chli wärmer worde. Die einte Quetscher hei scho töif id Schminki glängt oder sich regurächt drigleit, während die angere gmüetlech no chli ghöcklet si, am Märchy d Hoor gschnitte hei, aui Ballöön vo dr Chöubi ufkouft hei oder eifach dr Obe mit Gspräch und Bierli hei lo starte.
De het de scho gli die erschti Gugge gspöut. Leider hani NEK mitbecho, wie si gheisse hei und si si au NEK luut gnue gsi, für dassi die musikalischi Leischtig vorem Zäut usse hätti chönne beurteile. Derfür isch de üse Uftritt schnäu mou cho. S isch immer mega die Blicke vo de Zueschouer zgseh, we mer inere NEKändenwollende Einerkollonne dürs Zält uf d Bühni loufe. Me cha nes vo de Lippe abläse „do chöme jo no meh“ :-) Dr Uftritt isch WÄLTKLASS gsi, mit Hüehnerhuutgarantie. Gemäss eme nichtbestochene, unparteiische Zueschauer (werum het äch dä die gliche Latzhose agha wie ig??), het au s NEK sehr guet tönt. D Quetscher chöis aso no immer. Es Lied mit nume eire Gsamtprob uftrittsriif härebrätsche. Geil! NEK z vergässe, dr Benno het sis NQ-Tambi-Döbü mit Bravuur gmeischtert! Dankä Benno :-)
Dr räscht vom Fescht hei d Quetscher dür die ganzi Halle uf diversi Arte gfiiret. Die einte hei de d Bühni zur Tanzflächig macht, während die angere sich wichtige, töifgründige Gspräch und Gheimnis gwidmet hei (i ha es Gheimnis, i ha es Gheimnis :-)). Het öper die dritti Gugge ghört?? Ig au NEK. Irgendwenn spät und spöter i dr Nacht hei mer üs ufe Wäg is Bett gmacht, die einte id Ungerkunft, die andere is Hotel Stossplatz. Aber werum isch au d Andrea am Morge i dr Ungerkunft usem Bett kroche? Vilech isch ihre s Hotel mit däm Name doch NEK ganz ghüür gsi. Dank de gwüssne wo düregmacht hei oder frühe ufgstange si, hei mir Langschlöfer feini Gipfeli und Schoggidrink Zmorge übercho, bevor mer üs wider mit dene tolle Erinnerige und Idrück ufe Heiwäg gmacht hei.
Danke liebi Quetscher für das tolle Wucheänd! Fröie mi uf meh und be gspannt, was s 10-Jährige-Jubi de scho gli bringt.
Posuune grüen – Pönky alias Trix
Guggefestival Appezöll 28.September 2013
Wieso ned mol e Bricht, so wie im Vogel de Schnabel gwachse esch? 
Met gspannter Vorfreud packi mi Schlofsack, mini Posune ond mi frösch fertiggtellti Grind i Kofferrum vo mim Auto, zieh mi Bärner Mutz a ond bloche uf de Autobahn Richtig Hauptstadt vom Kanton Innerrhode (het aber nüt mit de Produktionsstelle vo de männliche Keimzelle ztue).
Scho bald machi aber Bekanntschaft met mine Arbetskollege, grrrr. I gseh si zwar ned, aber i chome secher es Föteli öber – Blitzer sei Dank. Nachere guete Stond Fahrt hanis ändlech gschafft. De Vogel esch do....
Wo glichzitig mis mobile Deheime för die nöchschte zwe Täg achonnt, gheie mer fasch d’Auge use. Läck gseht das geil us :-) S Showgirl Jessy winkt wie d’Queen persönlich usem Dachfenschter vom ombaute Laschtwage. D Ladeflächi vom Rieseviech esch met allne Finesse förs bevorstehende N.Q.-Weekend usgstattet. De Chauffeur Andy, parkiert s Unikum diräkt näb de Feschthalle ond sini Metfahrer zaubere im Nu e gmüetleche Meetingpoint för alli Note.Quetscher äne. Gseht eifach genial aus. Bevors aber losgoht, werd zerscht mol so rechtig schwizerisch gässe. Es feins Fondue, wohlverstande ohni Gaskocher, aber met Brönnpaschte, wird uftischet. Aber ned öppe es Fertigfondue, sondern e Mischig vom Feinschte gets us dere sämige Masse. Es rechtigs Fondue brucht ebe Zyt bis es guet esch. Jo die cheibe Brönnpaschte.....
Met vollem Buch - natürli au met chli Alohol, aber nor schüüch - spele mer uf de Bühni vom Gaschtgäber i ond hey? – es tönt fantastisch. Läck i freue mi so ufe Uftritt. Bis zum Act am halbi Elfi mache mer s Feschtgländ vo de Emils-Gugge no chli unsicher. I dem send jo d Note.Quetscher rächt guet :-). Das muesch eifach gseh ha. Emmer meh N.Q.’s verwandle sech nach ond nach zo sensationelle Konschtwärk. Die Einte chöme met Ballön, die Andere händ scho tolle Schmuck vom Schläckstängulade omghänkt. Es chonnt guet.... Veli vo eus chöme weder e gmolete Schnauz öber, die andere e schwarze Zensurbalke oder e wondschöni Note öbers ganze Gsicht – Mia du besch eifach sensationell. I wett bim nöchschte Mol no schönner wärde..... 
Ändlech gohts los. Bühni rockt ond Bsuecher gähnd au Vollgas. So macht e Uftritt richtig Spass. Es esch so toll, dass de Uftritt vel vel z schnäll verbi esch. I hätt no lang chönne....
Aber nachem Uftritt goht d Party no laaaang witer. Es esch schiins rechtig guet gsi. Leider hani es paar Lücke i mim Erinnerigsvermöge. Weiss gar ned wieso :-)
Uf jede Fau esch es för me es unvergässlechs Fescht gsi. I freue mi jetzt scho uf s nöchschte Weekend met euch.
Posuune blau - Reto Vogel
Auftritt Appenzell
Es esch halt scho speziell, ech ha min erschti Uftrett met de Quetscher gha. Närvös, nei sehr närvös ben ech gsii. Em Buuch esch es chriibele ond zabbele gsii, aber das bruuchts halt.
Ech be guet of Appenzell cho. Die erschti Stond esch gschwend e chli hecktisch gsii, wel ech no ha dörfe go Bühni aluege för de Uftrett.
Aaschliessend esch den grad Iispele of em Programm gstande ond das hend mer super öber Böhni brocht. Dank de Dissziplin vo dem ganze Huufe esch das Iispele en chorzi, seggi ond sehr agnähmi Sach gsii. Ech ha gar ned de Ziit gha no närvös zsii.
Bim erschte Bier ond emene sehr leckere Aesse send so die erschte Gspräch entstande. Chriibele ond chräbbele em Buuch esch schlimmer worde. S’zwöite Bier hed do au ned chönne hälfe.
Ond plötzlich esch es so wiit gsii. De Rhytmus esch losgange ond die Quetscher send rechtig Böhni gloffe.
Es bsonders Gfühl esch es gsii vor dem grosse Huufe stoh. Johre lang hend sie sech a Rolf gwöhnt gha ond jetzt stohd en Andere devore. Wie reagiere dächt die alli? Hoffentlich passiert nüüd schlemms? Settigi Gedanke send dör mine Chopf gschosse!
Aber es esch alles anderscht cho. Ech ha en super Uftrett dörfe gniesse. Alli send parat gsii ond hend gholfe das Ding schauckle. S’Volk hed sehr freud gha a üsem Uftrett .
För mech onvergässlich de erschti Uftrett ond die erschte Iidröck met de Quetscher of de Böhni.
Aaschliessend a üse Uftrett heds de no es paar Bier gäh, aber ech has sie nömme zählt wie am Aafang.
För mech esch das Wochenendi extrem schön gsii. Veli neue Lüüt han ech dörfe könne lere ond ech ha en sehr grossi Onderstötzig gha vom ganze Verein.
Danke vel mol!!
Ech freue mech riesig of de Frühelig ond be sehr motiviert met de Quetscher en huufe Ziit zverbrenge.
Tambi Benno
